Формирана Комисија за стручен надзор во врска со случајот со родилката која скокна од првиот кат на Гинекологија
На барање на министерот за здравство, Фатмир Меџити денеска е формирана Комисија за стручен надзор во врска со случајот со родилката од Скопје која во неделата се фрли од првиот спрат на Гинекологија. Државниот санитарен и здравствен инспекторат вчера го заврши вонредниот инспекциски надзор, а од ГАК велат пациентката покажала само знаци на лесна вознемиреност.
Комисијата за стручен надзор, составена од двајца гинеколози, психијатар, клинички психолог и претставник од МЗ има задача да изврши надозр над стручната работа во ЈЗУ Универзитетска клиника за гинекологија и акушерство во врска со лекарскиот третман на родилката. По добивање на извештајот од стручен надзор јавноста ќе биде информирана за констатираната состојба – се наведува во соопштението од Министерството.
Исто така, од Министерството додаваат дека ќе бидат преземени соодветни мерки согласно извештајот на ДСЗИ.
Триесет и деветгодишната родилка, во неделата скокнала од првиот кат на Клиниката за гинекологија и акушерство во Скопје. На прес-конференција директорката на ГАК, д-р Викторија Јовановска информираше дека родилката е во критична состојба.