„Топчиите“ предводени од менаџерот Микел Артета на својот „Емирати“ стадион успеаја со 1:0 да го совладаат Лидс во рамките од третата рунда на ФА купот.

Гостите водеа рамноправна борба особено во првото полувреме. После обидот на Бамфорд кој ја погоди пречката, се редеа шансите на Лидс кој беше поблиску до погодок, со вкупно 15 удари, но мрежата на домаќините мируваше.

Македонскиот репрезентативец Езгјан Алиоски беше стартер, имаше и убава шанса во првото полувреме, но топката заврши само покрај голот. Нашиот играч настапи до 61. минута кога беше заменет од Португалецот Хелдер Кошта.

Арсенал во вториот дел одигра многу подобро, а таа добра игра ја круниса со гол во 55. минута. Иако доста среќно, Рајс Нелсон најдобро се снајде и ја затресе мрежата за радост кај неговите соиграчи и навивачи.

После ваквата елиминација фудбалерите на менаџерот Биелса можат комплетно да се фокусираат на обврските во Чемпионшип преку кој ќе се обидат да се вратат во Премиер лигата.

Моментно во Чемпионшип екипата на Лидс после 26. кола се наоѓа на првото место со 52 бодови, колку што има и второпласираниот состав на Вест Бромвич.