Европските производители на автомобили обезбедија помалку од една шестина од клучните суровини што ќе им бидат потребни до 2030 година за производство на батерии за електрични возила, според анализата која предвидува голема побарувачка и пазарна битка за ресурсите на зелената технологија, објави Индекс.хр.

Производителите на автомобили обезбедија договори за 16% од литиум, кобалт и никел потребни за исполнување на нивните цели за продажба на електрични автомобили во 2030 година, според анализата на Tранспорт&Енвајармент (T&E), лобистичка организација со седиште во Брисел, пишува Гардиан. Двата најголеми светски производители на електрични автомобили, Тесла во САД и кинескиот БИД, беа далеку пред многу од нивните европски ривали во обезбедувањето пристап до клучните суровини, открија истражувачите. Батериите што се користат во уредите од мобилни телефони до автомобили се направени од прецизно контролирани комбинации на метали.

Постои глобална трка да се најде доволно литиум, најлесниот метал, но кобалтот и никелот се исто така важни во многу батерии. Анализата покажа дека производителите на автомобили објавија договори кои покриваат само 14% од литиум, 17% од никел и 10% од кобалт потребни за исполнување на целите од 2030. ЕУ и Велика Британија ќе ја забранат продажбата на нови автомобили од фосилни горива во 2035 година.