Најмалку 57 луѓе загинале, а десетици се ранети за време на најновите етнички конфликти во источниот дел на Јужен Судан, во регионот Џонглеј, изјави денеска локален претставник.

Вооружени групи млади членови на племето Нуер нападнаа припадници на етничката група Мурле во административната област Пибор, изјави министерот за информации на таа област Абрахам Келанг.

Јужен Судан, кој се стекна со независност од Судан во 2011 година, со децении е сцена на насилство, како и на конфликти околу стоката и земјиштето.

Според Келанг, најновите судири започнале во неделата, кога вооружени младинци од Џонглеј го нападнале селото Ланам. Тогаш беа убиени и напаѓачите и нападнатиот, а беа повредени 17 лица од етничката група Мурле.

Министерот за информации на округот Џонгли, Џон Самуел Манџуон ги осуди судирите и им нареди на напаѓачите да се повлечат. Тој ги повика и националните власти во Џуба да интервенираат, бидејќи, според него, ситуацијата во Џонглеј излегла од контрола.

Вооружени млади нападнаа и касарна, а портпаролот на јужносуданската армија генерал-мајор Лул Руаи рече дека армијата соодветно ќе се справи со „бунтовниците”.

Мисијата на Обединетите нации во Јужен Судан неодамна предупреди на мобилизација на млади членови на племето Нуер во пошироката област Џонглеј и оцени дека тоа би можело да поттикне насилство што ќе ги поткопа неодамнешните мировни придобивки постигнати преку преговорите меѓу лидерите на Џонглеј и областа Пибор.

Во март 2020 година, илјадници луѓе беа раселени поради конфликти слични на сегашните.