Селекторот на кошаркарската репрезентација на Естонија Јука Тојала ја спореди салата СРЦ „Кале“ каде што неговиот тим в петок ќе игра со Македонија, со мечкино дувло.

Тојала дал изјава на почетокот на подготовките на Естонија за стартот на квалификациите за ЕП 2025. Првиот меч помеѓу Македонија и Естонија се игра в петок во СРЦ „Кале“ и за обата противника е од исклучително значење затоа што лесно може да се случи резултатот да биде клучен за тоа која од овие две репрезнетации ќе оди на ЕП 2025. Еве дел од изјавата на Тојала за тој меч:

– Мораме да бидеме поинтензивни и поенергични од нашиот противник. Мислам дека имаме формација во која имаме доволно сила да победиме, но тоа треба да го докажеме на теренот. Секогаш е тешко да се игра на гости, особено во такво мечкино дувло во кое тие играат – вели Тојала за претстојниот меч со Македонија.

И квалификациите за претходното ЕП за овие две селекции почнаа во Скопје пред четири години („Борис Трајковски“). Тогаш Естонија победи со 81-72, резултат што подоцна низ квалификациите се покажа кобен за нас во обидот да се пласираме на Евробаскетот. Но за Естонците беше среќен и тие сакаат историјата да се повтори в петок.

– Пред четири години се започна на ист начин… Имаме чувство на „дежа ви“. Нов и интересен квалификациски циклус треба да започне и ние ќе постигнеме ист резултат… – вели финскиот стручњак Тојала.

Според него целта на естонскиот тим е да испише историја, односно да се пласира двапати во низа на ЕП, што досега од добивањето на независност оваа земја не го постигнала.

Македонија и Естонија ги започнуваат квалификациите в петок во СРЦ „Кале“ (19 ч), а натпреварите во квалификациската Група Х започнуваат в четврток со мечот Литванија – Полска. Во февруарскиот „прозорец“ ќе играме уште со Полска на гости в понеделник.