Џез-сцената се збогатува со деби-албум на ансамбл од познати музичари
Промоцијата на деби-албумот „Incorporated“ на ансамблот „Skopje Jazz Inc.“ ќе се одржи на 12 септември, во 20 часот, во Кафе-бар Филхармонија.
Деби-албумот е резултат на повеќегодишно заедничко музицирање, период во кој бендот изгради свој единствен и препознатлив стил што се темели на традицијата, со смел поглед кон иднината.
Бендот го сочинуваат музичари добро познати на домашната и меѓународната џез сцена: Трајче Велков на труба, Зоран Костадиновски на гитара, Горан Ѓешовски на бас и Виктор Филиповски на тапани.
На албумот се наоѓаат седум авторски композиции, дела на Трајче Велков и Зоран Костадиновски. На албумот гостуваат двајца префинети и добро познати музичари, Кирил Кузманов на флејта и Гордан Спасовски на пијано.
Албумот е снимен во студио „Алшар“ во Скопје. Снимател и тон-мајстор е Ивица Јанкуловски. Албумот го издава издавачката куќа „ЗЏМ Рекордс“ (ZJM Records).