Два подиуми на македонските триатлонци во Пловдив
Два подиуми освоија македонските натпреварувачи на отворениот триатлон куп кој се одржа во Пловдив, Бугарија.
Иво-Јован Димовски беше прв во генерален пласман, а Александар Хаџиандов втор помеѓу кадетите. На натпреварот настапија вкупно 11 триатлонци од клубот „Триоги“ од Скопје.
Ова е продолжување на добрите резултати на нашата земја на меѓународната триатлон сцена.
Претходно во четвртото коло од Хрватската лига во Сплит, настапија шест претставници од клубовите Триоги и Софка, а Иво-Јован Димовски се избори со сериозната конкуренција и застана на третото место на интернационалниот подиум.
На интернационалниот триатлон натпревар во Русе, Бугарија настапија четворица претставници на клубот Три Дисциплинс. Најмалите Јован Кутаноски и Виктор Опетчески (родени 2014та год.) ги земаа деветтото и 12 место во категоријата 2011-та и постари, и првото и второто место во категоријата 2013-та и постари. Во женска конкуренција Тија Кукунешоска (2010 год.) и Олса Орани (2007 год.) дојдоа до шестите места во своите категории.