Државата ќе ги исплати здравствените работници директно од трезорот, ако до понеделник не се реши проблемот со ФЗО
„Изнајдено е решение за исплата на платите во здравството, дури и ако до понеделник не се реши проблемот со системот на Фондот за здравство“, соопшти попладнево Министерството за финансии. Министерот Фатмир Бесими, во гостувањето на националниот сервис МТВ, рече дека доколку до понеделник ФЗО не го реши проблемот со хакираниот систем, парите за платите на лекарите и здравствениот персонал ќе бидат префрлени директно од централниот трезор, а понатаму ќе се изврши порамнување со Фондот.
„Очигледен е техничкиот проблем со системот во ФЗО, и тоа е хибридна војна која не се случува само кај нас, следствено на тоа и со исплатата на платите за здравствените работници. Доколку набрзо (зборувам за ден два) не се отстрани проблемот со системот на ФЗО, платите ќе се исплатат од Трезорот, а понатаму ќе се направи порамнување со буџетот на ФЗО. Мора да нагласам дека ФЗО има друг систем на исплата од трезорот па затоа е проблемот. Ова е вон редовните процедури, но е во рамки на законот”, рече Бесими.
На прашањето дали има доволно пари за исплата на платите на здравствениот сектор, министерот рече дека буџетот е ликвиден, како и дека приходите во буџетот од почетокот на годината заклучно со средината на февруари се повисоки за 10% во однос на истиот период лани.