Драма пред полетување, на патниците почнале да им стигнуваат слики од авионски несреќи
Пилотот на турскиот авион на компанијата АнадолуЏет го прекина полетувањето на главниот аеродром во Израел откако патниците добија слики од авионска несреќа на нивните телефони, пишува Би-Би-Си.
Од авиокомпанијата соопштија дека авионот се движел на аеродромот Бен Гурион кога се случил инцидентот.
Патниците и екипажот биле евакуирани, а сите багажи повторно прегледани.
Неколку млади Израелци беа идентификувани како осомничени, по што полицијата ги приведе. Авионот тргнал со пет часа задоцнување откако бил одобрен да замине.
Авионот „Боинг 737“ на „Анадолу Џет“, со 160 патници, бил подготвен за полетување кога патниците го известиле екипажот дека добиле вознемирувачки фотографии. Пилотот бил информиран и решил да се врати на терминалот.
Хебрејскиот информативен сајт Ynet објави дека сликите биле споделени преку AirDrop, услуга на Епл која им овозможува на корисниците да испраќаат датотеки од еден уред на Епл на друг на кратки растојанија.
Сликите биле од авион на Туркиш ерлајнс кој се урнал во Холандија во 2009 година и уште една авионска несреќа во САД во 2013 година, соопшти Ynet.
На патниците им било кажано дека можат повторно да се качат на повторно прегледаниот авион, кој се упатил кон Истанбул, или да останат во Израел.