Поранешниот министер и вицепремиер за европски прашања, Никола Димитров, смета дека зад агресијата врз Украина стои Путин и неговиот страв од демократска и слободна соседна Украина, како и желбата за враќање назад во историјата, односно историски ревизионизам.

-Судејќи според јавните протести против војната во Русија, земја каде е опасно да се излезе на протест, прашање е колку рускиот народ ја одобрува оваа војна. Нападот врз една независна држава која не е закана, која со ништо не ја испровоцира оваа војна е напад врз слободниот свет, врз европската безбедност и врз светскиот поредок што почива на Повелбата на ОН. Ако слободниот свет ова го дозволеше без драматично одлучен одговор, сите ќе се вратевме во џунглата и законот на голата сила, појаснува Димитров во објава на социјалните мрежи.

Според него, за нас, како мала земја, принципите се егзистенцијално важни.

-Особено по говорот на Путин, кога ја нарече Украина вештачка творба на Ленин, без право да постои, тој требаше да ги изгуби сите македонски симпатизери. Сите до еден, оценува Димитров.