Британскиот премиер Борис Џонсон денеска предупреди дека третиот бран на пандемијата со ковид-19, што веќе ја разорува Европа, може да ја погоди и Велика Британија.

– Претходните искуства нè научија дека штом бран ги погоди нашите пријатели, се плашам дека ќе ги погоди и нашите брегови и очекувам да ги почувствуваме тие последици во догледно време, изјави Џонсон.

Запрашан за ризиците по програмата за вакцинација на Велика Британија од заканите на ЕУ за забрана за извоз на вакцини во Велика Британија, Џонсон вели дека мисли дека тоа нема да се случи.

Претседателката на Европската Комисија (ЕК), Урсула фон дер Лајен во средата објави заострување на правилата за извоз на вакцини за ковид-19 во оние земји кои имаат поголема стапка на вакцинација и кои го ограничуваат извозот на вакцини произведени на нивна територија.

Европските лидери треба да разговараат за забраната за извоз на „АстраЗенека“ во Велика Британија на виртуелниот самит в четврток.