Смет низ јавните површини, но и купишта отпад околу контејнерите. Ваква е сликата изминативе неколку месеци откако Општина Тетово во неколку наврати вети дека словенечка компанија со која потпиша договор ќе започне да го менаџира сметот.

Но, странците никаде ги нема, а купиштата отпад се на секој чекор.

Она што загрижува е што отпадот е се поблиску до децата. Дива депонија никна во детската градинка во тетовската населба Поток, а во дворот каде има отпад се напасува и добиток.

Во време кога градот под Шара урива рекорди по аерозагаденост каде изминативе неколку дена концетрацијата на ПМ 10 честичките беше и за до 5 пати поголема од максималните граници, општинските власти буквално со прст не мрднуваат да преземат одредени чекори за ублажување на состојбата.

Градот се гуши во сообраќаен хаос и неконтролирана урбанизација, а она што највеќе загрижува е што тој се гуши и во кал и прашина.