Жителите од селото Драчево, односно оние кои живеат на улицата Илија Ристовски наскоро ќе добијат фекална канализација. Околу деталите за реализацијата на овој проект локалното население разговараше со градоначалникот на Општина Кисела Вода Орце Ѓорѓиевски на заедничката средба.

– Повеќе од 30 години жителите од улицата Илија Ристовски во село Драчево (Порупа) живеат во субстандарни услови, што е поразително да се случува и во 21 век. Но, сето тоа завршува. Дојдов да им соопштам дека поставуваме фекална канализација на оваа улица и го решаваме деценискиот проблем со кој се соочуваат нашите сограѓани. Подобрување и нормализирање на условите за живеење е наша должност за која се обврзавме, затоа ќе ги решаваме дури и најситните проблеми кои ги мачат нашите сограѓани. Етапно, чекор по чекор Кисела Вода ќе станува место за живеење какво што заслужуваат нашите сограѓани. Модерно, чисто и инфраструктурно уредено – истакна Ѓорѓиевски.