Ако земате додатоци во исхраната со кафе секое утро, можеби е време да ја промените вашата рутина.

Нутриционистката Рејчел Лустгартен објаснува за порталот „Гуд хаускипинг“ (Good Housekeeping) зошто кафето може да се меша во апсорпцијата на одредени витамини – и како правилно да ги распределите во текот на денот.

Дали го пиете утринското кафе веднаш по земањето витамински додаток? На прв поглед, изгледа безопасно, но според ново истражување – оваа навика може да ја намали ефикасноста на додатоците што ги земате.

Кафето содржи супстанции што можат да се мешаат во апсорпцијата на важни хранливи материи, особено ако веќе немате доволно од нив во вашето тело.

Во продолжение прочитајте за да дознаете кои витамини и минерали се најчувствителни на кофеинот, кога е најдобро време да земате додатоци – и зошто треба да размислите за распоредот за пиење на вашата омилена шолја кафе.

Железо

Ако пиете кафе заедно со суплемент на железо, ризикувате да апсорбирате дури 50 отсто помалку од тој минерал.

Студија од 2022 година од Швајцарија покажала дека жените кои земале железо со кафе имале значително намалена апсорпција во споредба со оние кои го земале со вода.

Виновникот се полифенолите и танините во кафето, кои го блокираат искористувањето на железото.

Витамин Д

Поголемиот внес на кофеин е поврзан со пониски нивоа на витамин Д во крвта, покажала студијата од 2021 година.

Се смета дека кофеинот се меша со рецепторите за витамин Д, што може да биде особено штетно за оние кои веќе имаат недостиг на овој витамин, кој е важен за имунитетот и здравјето на коските.

Витамини од групата Б и витамин Ц

Кофеинот делува како благ диуретик, што значи дека го поттикнува елиминирањето на течностите од телото – заедно со неа и витамините растворливи во вода, вклучувајќи ги витамините Б комплекс и Ц.

Исто така, полифенолите во кафето дополнително ја попречуваат нивната апсорпција.

Калциум

Витаминот Д е неопходен за апсорпција на калциум, па кога кафето се меша со витаминот Д, индиректно влијае и на искористувањето на калциумот. Ова е особено важно за постарите лица и за секој што е изложен на ризик од остеопороза.

Кога е најдобро време за земање суплементи, а кога за кафе

Ако користите некој од споменатите витамини, експертите советуваат да помине најмалку еден час помеѓу земањето додатоци во исхраната и консумирањето кафе. Идеално би било да пиете кафе со појадок, а додатоците да ги земате дури еден или два часа подоцна.

Нутриционистката Шели Болс препорачува да не пиете кафе на празен стомак, како и да го ограничите дневниот внес на кофеин на две шолји на ден, за да не се наруши апсорпцијата на хранливи материи.

Практичен совет: Поделете ги вашите суплементи на оние што можете да ги земате во текот на денот (како омега-3) и оние што треба да ги поместите навечер (железо и калциум), кога повеќе не пиете кафе.