По повод Денот на храброста во Софија има свечена церемонија, на која учествува и претседателот и врховен командант на вооружените сили на Бугарија Румен Радев, јави дописникот на МИА од Софија.

Демонстрациите на воздухопловните способности на небото над Софија започнаа со лет на хеликоптер „Кугар” со бугарско национално знаме. Вештини на војници и презентација на воена опрема ќе бидат достапни денеска во Казанлак, Варна и во центарот за обука во Цринча.

Оваа година, денешната церемонија ќе биде пред Споменикот на непознатиот војник во Софија, со што ќе се комбинираат двете свечености – осветувањето на борбените знамиња и армијата и свечената поворка.

Во Варна, војниците од морнарицата ќе покажат елементи на операција за заштита на поморската безбедност, а во Центарот за обука во Цринча, силите за специјални операции ќе демонстрираат способности при спроведување на специјални разузнавачки информации и акции за неутрализирање на терористите.

Во честитка на Фејсбук, бугарскиот премиер во оставка Бојко Борисов и го честита празникот на бугарската армија и истакна дека треба да продолжи модернизацијата и подобрувањето на условите за работа во армијата.

– На 6 мај го славиме и Денот на храброста, но храброста мора да има конструктивна цел, бидејќи битките мора да бидат добра кауза, напиша бугарскиот премиер Бојко Борисов.