Британската влада ја разгледува можноста да испрати воени бродови во Југоисточна Европа, со цел да ги заштити своите сојузници, изјави британскиот премиер Борис Џонсон пренесува „Тајмс“.

Според него, Британија се подготвува да го зајакне мултинационалниот баталјон на НАТО стациониран во Естонија. Џонсон напиша дека Британија исто така ќе го зголеми својот придонес во Здружените експедициски сили – здружение предводено од Лондон, кое вклучува сили од 10 земји од Скандинавија и северна Европа.

Лондон сака да испрати „тајфун“ борбени авиони на Кралското воздухопловство и бродови на Кралската морнарица, со цел да ја заштити Југоисточна Европа наведува Тајмс

британски борбен брод EPA-EFE/VICKIE FLORES

Џонсон, сепак, изрази уверување дека кризата во Украина може да се реши со дипломатски средства.

Британскиот премиер рече и дека санкциите и другите мерки ќе бидат подготвени во случај на руски напад врз Украина, а неговата влада ќе побара од парламентот санкции за руски поединци и компании.

„Британските санкции и другите мерки ќе бидат подготвени во случај на каков било руски напад“, напиша тој во текстот кој го објави „Тајмс“

„Владата ќе бара нови овластувања од парламентот за санкционирање на поширок опсег на руски поединци и ентитети, вклучително и секоја компанија поврзана со руската држава или која работи во сектор од стратешко значење за Кремљ“, наведува Џонсон во написот објавен од „Тајмс“.

Американскиот претседател Џо Бајден вчера по средбата со германскиот канцелар Олаф Шолц изјави дека гасоводот „Северен тек 2“ ќе биде стопиран доколку Русија ја нападне Украина. Шолц рече дека двајцата имаат унифициран пристап кон Украина, Русија и санкциите, но директно не ги потврди плановите за „Северен тек 2“.

Западот ја обвинува Русија дека подготвува, како што тврди, „инвазија“ на Украина и ѝ се заканува на Москва со воведување остри санкции во случај на напад ,што Русија ги отфрла тие тврдења.