Поради боледување, денеска е одложено рочиштето за случајот „Топлик”. Овој предмет се однесува за продажбата на државното земјиште за изградба на комплексот „Сончев град” во Сопиште.

На денешното рочиште во судница присутни беа првоосомничениот во случајот, екс-министерот за транспорт и врски Миле Јанакиески и другите петмина обвинети, како и повиканите сведоци.

Според обвинението на СЈО, првоосомничениот Јанакиески, како раководно лице во Министерството за транспорт и врски, спротивно на Законот за јавни набавки составил Комисија за јавни наддавања на која ѝ наложил да избере понудувач за купување и располагање со државно земјиште за изградба на елитниот комплекс „Сончев град” во Сопиште, иако фирмата не ги исполнувала условите за тоа.

Од доказите, според СЈО, произлегува дека раскинувањето на договорот е по вина на Министерството, тоа се обврзало во износ од еден милион евра да му исплати долг и затезна камата на правното лице „Сан сити”.

Според обвинението Јанакиески и другите петмина обвинети го оштетиле државниот Буџет за 64.206.839 денари односно за милион и 44.000 евра.