Претседателот на Регулаторната комисија за енергетика (РКЕ) Марко Бислимоски демантира дека со пристапот до мрежа е измислена нова давачка и вели дека тоа е лага. Во гостувањето во „Студио 10“ на ТВ 24 објаснува дека само се прераспределени трошоците за да има пофер пристап.

– Не може некој што не поставил фотоволтаици да плаќа за некој што поставил, изјави Бислимоски.

Тој додаде дека фиксниот трошок за пристап до мрежа ќе го плаќаат сите, без разлика дали трошат или не во месецот, но со тоа се обезбедува фер пристап за останатите, за да не се покачи цената на електричната енергија.

– Направивме рамномерна распределба, да учествуваат сите во фиксните трошоци. Тој што има викендичка и оди пет до десет пати таму ќе учествува во фиксните трошоци. Вакви мерки постојат во 18-20 земји од ЕУ, рече Бислимовски.

Исто така, објасни дека сите ќе плаќаат по 200 денари и дека доколку не се воведеше оваа мерка, цената на електричната енергија во сите тарифни модели ќе се зголемеше.

– Доколку не воведовме фиксен надоместок, цената на првиот блок немаше да се намали за 5,16 отсто, туку ќе се зголемеше за 3,4 проценти. Цената во вториот блок ќе се зголемеше за 8,62 проценти и цената на евтината струја ќе се зголемеше за 15,42 проценти, рече Бислимовски.

Објаснувајќи дека новата цена на струјата е збир од цена за енергија, плус збир и плус мрежарина, тој им порача на граѓаните да имаат доверба во РКЕ како институција бидејќи, како што рече, Комисијата ги носи одлуките врз основа на знаење.