Министерот за економија Крешник Бектеши не е сигурен до каде е процедурата за Законот за платите на функционерите. Одговарајќи на прашање за темата, тој ги упати новинарите да се обратат до Министерството за финансии и до вицепремиерот Фатмир Битиќи, бидејќи тој не бил дел од групата која го изготвува законското решение.

-Лично поддржав да има замрзнување на платите за функционерите, но не сум дел од групата која го работи законот. Барајте подетално објаснување од министерот Бесими и вицепремиерот Битиќи, тие се надлежни. Не сум сигурен до каде е оваа процедура – одговори Бектеши.

За потсетување, ќе се стори една година откако функционерските плати се зголемени до 78 отсто (март 2023), а во меѓувреме јавноста постојано бара одговори што се случува со ветувањето дека ќе има нивно намалување. Ваквото зголемување предизвика многу критики во јавноста и серија штрајкови во јавниот сектор, а надлежните се правдаат дека е потребно време за новото законско решение.