18-годишен хакер кој објави клипови од долгонајавуваната Гренд Тефт Ауто 6 (ГТА 6) е осуден со неопределен болнички притвор. Арион Куртај од Оксфорд, кој е аутист, беше клучен член на меѓународната банда Лапсус (Lapsus$), пренесува Би-Би-Си.

Нападите на бандата врз технолошките гиганти, вклучувајќи ги Убер, Нвидиа и Рокстар Гејмс ги чинеа фирмите речиси 10 милиони долари. Судијата рече дека вештините и желбата на Куртај да изврши сајбер-криминал значат дека тој останува висок ризик за јавноста.

Тој ќе остане доживотно во болница доколку лекарите не проценат дека повеќе не претставува опасност. Куртај наводно бил насилен додека бил во притвор со десетици пријави за материјална штета. Лекарите сметаат дека Куртај не е способен да му се суди поради неговиот тежок аутизам, па од поротата беше побарано да утврди дали тој ги извршил наводните дела или не – не дали тоа го сторил со криминална намера.

Проценката на менталното здравје користена како дел од сослушувањето за изрекување на пресудата објави дека тој „продолжил да ја изразува намерата да се врати на сајбер-криминалот што е можно поскоро. Тој е многу мотивиран“.

На судот му беше кажано дека додека бил на кауција за хакирање на Нвидиа и БТ и во полициска заштита, тој продолжил со хакирањето и го извршил својот најозлогласен случај. И покрај тоа што му бил одземен лаптопот, Куртај успеал да ги пробие Рокстар Гејмс, компанијата која стои зад ГТА, користејќи Амазон Фајерстик.

Куртај украл 90 клипови од необјавената игра ГТА 6. Тој упаднал во внатрешниот систем за пораки на компанијата, Слек каде им напишал„ако Рокстар не ме контактира на Телеграм во рок од 24 часа, ќе почнам да ги објавувам клиповите“.

Потоа тој ги објавил видеата на форум под корисничкото име ТиПотУберХакер. Тој бил повторно уапсен и задржан во притвор до неговото судење. На почетокот на овој месец, трејлерот за ГТА 6 беше објавен со 128 милиони прегледи на Јутуб за само 4 дена.

На рочиштата за изрекување на казната, одбраната на Куртај тврдеше дека успехот на трејлерот на играта укажал дека хакирањето на Куртај не предизвикало сериозна штета на развивачот на играта и побара тоа да се земе предвид во изрекувањето на казната.

Но, судот објави дека има вистински жртви и вистинска штета предизвикана од неговите други повеќекратни хакирања на поединци и компании што ги нападнал со Лапсус. Тимот на Рокстар Гејмс на судот му соопшти дека хакирањето ги чинело 5 милиони долари.

Друг член на Лапсус, кој има 17 години и не може да биде именуван поради неговата возраст, беше прогласен за виновен во истото судење, кое траеше шест недели пред судот во Саутворк. Тој работел со Куртај и другите членови на Лапсус за да го хакираат технолошкиот гигант Нвидиа и телефонската компанија БТ и да украдат податоци пред да побараат откуп од четири милиони долари, кој не бил платен.

Тие, исто така, краделе директно од поединци преку нивните паричници со криптовалути. 17-годишното момче е испратено во болница за рехабилитација на млади во траење од 18 месеци, вклучувајќи интензивен надзор и забрана за користење на ВПН. Покрај хакерските напади, момчето е осудено за, како што рече судијата, „непријатна и застрашувачка шема на следење и малтретирање“ на две млади жени.

Куртај и 17-годишникот се првите членови на групата Лапсус кои се осудени, но се смета дека другите се уште се на слобода. Смелите напади на бандата во 2021 и 2022 година го шокираа светот на сајбер-безбедноста. Групата од Британија, а наводно и Бразил, пред судот беше опишана како „дигитални бандити“.

Бандата – за која се сметаше дека главно се тинејџери – користела трикови како измамници, како и компјутерско хакирање за да добие пристап до мултинационалните корпорации како што се Мајкрософт, технолошкиот гигант и дигиталната банкарска групација Револут.

За време на нивната мисија, хакерите редовно ги прославувале своите злосторства и ги исмевале жртвите на Телеграм на англиски и португалски. Тоа ги поттикнало американските сајбер-власти да издадат долг извештај за Лапсус и други хакерски банди.

Судот заклучи дека „јасно покажа колку е лесно за неговите членови (малолетници, во некои случаи) да се инфилтрираат во добро одбранети организации“. Не е јасно колку пари Лапсус заработи од своите сајбер криминали. Ниту една компанија јавно не призна дека им платила на хакерите и хакерите не ги дале лозинките за запленетите паричници со криптовалути.