Виолина што некогаш му припаѓала на еден од најпознатите научници во историјата, Алберт Ајнштајн, е продадена за 860.000 фунти на аукција, пренесува Би-би-си.

Се верува дека виолината на Кунтер од 1894 година била првата виолина на Ајнштајн, а првично се очекувало да достигне цена од околу 300.000 фунти кога била продадена на аукција во Англија.

Книга за филозофија што Ајнштајн му ја дал на пријател, исто така, е продадена за 2.200 фунти.

Сите цени ќе имаат дополнителна провизија од 26,4 проценти, што значи дека конечната цена на виолината ќе биде над 1 милион фунти.

Аукциската куќа „Доминик Винтер“ верува дека, кога ќе се додаде провизијата, продажбата би можела да биде највисоката досега за виолина што претходно не ја поседувал концертен виолинист или не ја направил Страдивариус – претходниот рекорд го држел инструмент што веројатно бил користен на Титаник.

Крис Албери, специјалист за историски сувенири, ја опиша продажбата, која била завршена за околу 10 минути, како „посебен момент“.

– Имавме три телефонски наддавачи кои беа вклучени до самиот крај – изјавил Албери.

Тој објасни дека многу луѓе не биле свесни дека Ајнштајн свири виолина.

– Ајнштајн секогаш велел дека ако не бил научник, би сакал да биде музичар. Почнал да учи виолина на четиригодишна возраст и свирел секој ден од својот живот – рекол Албери.

Седло за велосипед, исто така во сопственост на Ајнштајн, не се продало и може повторно да се најде на аукција.

Сите предмети кои се најдоа на аукцијата, му биле дадени на неговиот добар пријател и колега физичар Макс фон Лауе кон крајот на 1932 година.