Антонио Конте повеќе не е менаџер на Тотенхем
Антонио Конте и Тотенхем ја прекинаа соработката по 16 месеци, а истата беше официјализирана во неделата вечерта.
Последниве денови имаше многу шпекулации за оваа разделба, особено откако Конте ги нарече неговите играчи себични и ја критикуваше културата на клубот. Тоа се случи по разочарувачкиот резултат и ремито против Саутемптон.
Го остава тимот на Тотенхем моментно на четвртото место во Премиер лигата, но е елиминиран од сите куп натпреварувања сезонава.
По Маурицио Покетино, кој беше менаџер долги години, Тотенхем е во големи проблеми да најдат стручњак кој би направил резултат. По Аргентинецот беа Жозе Мурињо, Нуно Еспирито Санто, а сега е сменет и Конте.
Помошникот на Конте, Кристијан Стелини, ќе остане на функцијата главен тренер до крајот на сезоната, а ќе му помага поранешниот фудбалер Рајан Мејсон.
– Ни остануваат уште 10 натпревари во Премиер лигата и продолжуваме да се бориме за пласман во Лигата на шампионите – рече Даниел Леви, претседателот на Тотенхем.