Во јавноста почна да се шири веста дека дел од менувачниците не продаваат девизи, или пак не продаваат во поголем износ. Гувернерката на Народната банка, Анита Ангеловска – Бежоска, во изјава за „Слободен печат“ вели дека девизи на пазарот има и дека шпекулациите се многу опасни, поради што во тек се засилени инспекциски контроли од страна на Народната банка по менувачниците.

– Дејноста на менувачниците е откуп и продажба на девизи. Тие не смеат да ги чуваат, да не вршат менувачко работење и да создаваат паника. Тоа е недозволиво и ние можеме ваквото однесување да го санкционираме, вклучително и со одземање на лиценца за работа. Девизните резерви се стабилни и се 3,5 милијарди евра. Дополнително и банките си имаат свои девизи. Во крајна линија и банките продаваат девизи и граѓаните може да отидат кај нив и да купат колку сакаат, што е јасен показател дека девизи има – вели гувернерката Ангеловска – Бежоска.

Таа вели дека покрај шпекулативното однесување на одредени менувачници подгреано од шпекулации во јавноста за девалвација на денарот, дел од менувачниците, инцидентно, навистина може на кус рок да снемаат евра.

– Досега, по правило, менувачниците повеќе откупувале девизи отколку што продавале. Не се ни јавила потреба, тие да отидат во банка да бараат девизи. Но сега, веројатно народот е повоздржан и не ги продава девизите, па затоа некои од менувачниците можеби се довеле во состојба да имаат повеќе денари и да имаат потреба од девизи. Но, во сегашната регулатива не е предвидено банките да им продаваат девизи на менувачниците. Во тек се состаноци и со банките и со менувачниците на оваа тема, и тековно ја разгледуваме потребата за измена на регулативата – изјави Бежоска.

Таа потсети дека досега, при секоја криза, се подгреваат шпекулациите за денарот.

– Постојано кажуваме, еве сега ќе повторам, денарот е стабилен. Со него треба да се гордееме. На 26 април ќе прославиме 3 децении од неговото постоење. Народот, ни во еден момент нека не се грижи за неговата стабилност – децидна е гувернерката.