Тим нуркачи сѐ уште трага по трите лица кои вчера со автомобил паднаа во реката Лепенец. Потрагата се одвива во исклучително тешки услови бидејќи реката е длабока и многу брза, а со себе носи и предмети кои се опасност за нуркачите, информираше за МИА, директорот на Центарот за управување со кризи, Стојанче Ангелов.

Во меѓувреме Министерството за внатрешни работи вчера информираше дека екипи од Одделот за специјални полициски операции трагаат по три лица во реката Лепенец.

Според информациите од Министерството за внатрешни работи, возилото завршило во Лепенец откако автомобил „фолксваген туран“ со македонски регистарски ознаки претекнувал колона автомобили на патот од Скопје кон граничниот премин „Блаце“. Во моментот кога стигнал паралелно до автомобил „бмв“ со косовски регистарски таблички кој се движел во истата колона, двете возила се доближиле и странично се удриле, по што косовскиот автомобил со четворица патници излетал од патот и се превртел во реката Лепенец

Едно лице беше извадено од реката и пренесено во ГОБ „8 Септември“. Засега причините за сударот сѐ уште се утврдуваат.