Американската скијачка Микаела Шифрин победи во велеслалом, трка од Светскиот куп во Оре и го израмни рекордот на Ингемар Стенмарк од 86 победи.

Шифрин беше прва и по првото возење, а победи со резултат 1:54,86 минути. Американката го израмни апсолутниот рекорд на Стенмарк, кој во 70-те и 80-те години од минатиот век постигна 86 победи.

Тоа беше 20 победа на Шифрин во велеслалом во Светскиот куп, од кои шест постигна оваа сезона и го освои малиот кристален глобус на оваа дисциплина.

Во велеслалом е прва со недостижни 700 бода, пред Петра Влхова (Словачка) која има 486.

Второто место на денешната трка го освои Италијанката Фредерика Брињоне со 0,64 секунди заостанување. Швеѓанката Сара Хектор ја помина целта на третото место со заостанување од 0,92 секунди.

Четврта беше Влхова, петта Швајцарката Теса Ворли, а на шестото место се најде Канаѓанката Валери Грение.