Фернандо Алонсо ќе се обиде да ја прекине победничката серија на Макс Верстапен и Ред Бул и да ја оствари својата прва победа од 2013 година овој викенд во 80. издание на трката за Големата награда на Монако во Формула 1.

Алонсо и неговиот тим од Астон Мартин прават планови за да дојдат до победа на гламурозната улична патека, каде што Шпанецот триумфираше со Рено во 2006 година и со Мекларен во 2007 година.

По четири трети места од пет трки, Алонсо (41) сезонава е најголема закана за двократниот шампион Верстапен и неговиот тимски колега Серхио Перез и атракција во „циркусот“ како стар волк со незаменливо искуство.

– Имаме автомобил кој можеби не е најбрз на правите делови од патеките, но многу добар во свиоците. Таа особина е добро за патеките што се побавни како Монако и Будимпешта и Сингапу – вели Алонсо.

Фернандо е трет во генерален пласман за титулата кај возачите со 75 поени, зад Верстапен кој има 119 поени и Перез, кој е специјалист за улични патеки, лани победи во Монако, а победи и неодамна во Џеда, Саудиска Арабија и во Баку, Азербејџан, а има 105 поени.