Алиоски: Посакуваме победа над Малта и старт со три бода
Македонската А репрезентација на 23 март во Скопје против Малта (20.45 часот) на Националната арена „Тодор Проески“ – Скопје ќе ги започне квалификациите за пласман на Европското првенство 2024 Германија.
Селекторот Благоја Милевски го објави списокот со повикани фудбалери на кои ќе смета за споменатиот натпревар, како и за контролниот меч на 27 март против Фарски Острови.
Во нашата квалификациска група „Ц“ се и селекциите на Италија, Англија и Украина.
Македонскиот репрезентативец Езѓан Алиоски посакува успешен старт во новиот квалификациски циклус за ЕП.
– Среќни сме што после неколку месеци повторно се собираме со репрезентацијата на Македонија. Започнуваме нов квалификациски циклус и секако дека посакуваме победа над Малта и старт со три бода. За нас е исклучително важно успешно да ги започнеме квалификациите затоа што потоа ни следуваат многу посериозни натпревари во силната група со Англија, Италија и Украина. Посакувам сите да бидеме здрави и комплетни и верувам дека ќе го дадеме најдоброто од себе. Ќе се обидеме да одиграме одлични натпревари за успешни квалификации после историските резултати во последните години – вели Алиоски.
Милевски го објави списокот: Со еден дебитант против Малта и Фарски Острови