Фудбалерот на Јувентус, Пол Погба одлучи да го оперира повреденото десно колено, на два и пол месеци пред почетокот на Светското првенство во Катар, соопшти денеска тренерот на „Старата дама“, Масимилијано Алегри.

– Погба утринава излезе на тренинг, но застана и реши да се оперира – рече Алегри на прес-конференцијата во пресрет на натпреварот од Лигата на шампионите против ПСЖ.

Французинот доживеа повреда на коленото во јули, но потоа реши да не оди на операција за да ги зачува шансите да биде дел од репрезентацијата на Франција на Светското првенство 2022.

На почетокот на август беше одлучено тој да оди на „конзервативна терапија пет недели“, но тој третман не ги донесе посакуваните резултати.

Погба се врати во Јувентус во летниот преоден рок, откако помина шест години во редовите на Манчестер јунајтед.