Осумдесеттото по ред доделување на Златните глобуси ќе се одржи во Беверли Хилтон во Лос Анџелес на 10 јануари. Џерод Кармајкл ќе биде домаќин на овој престижен настан, на кој ќе им се оддаде почит на најдоброто од светот на филмот и телевизијата во 2022 година.

„Avatar: The Way of Water“, „Top Gun: Maverick“, „Elvis“, „The Fabelmans“ и  „Tar“ се филмовите номинирани за овогодинешниот Златен глобус во категоријата најдобар филм – драма.

Режисерските великани Стивен Спилберг (The Fabelmans), Баз Лурман (Elvis), Џејмс Камерон (Avatar: The Way of Water), Ден Кван и Даниел Шајнерт (Everything Everywhere All at Once), Мартин Мекдона (The Banshees of Inisherin), добија номинации во категоријата најдобар режисер.

Најмногу номинации има трагикомедијата на Мартин Мекдона „The Banshees of Inisherin“, кој со осум номинации, важи за еден од големите фаворити пред Оскарите.

Во категоријата за најдобар филм за комедија или мјузикл, номинирани се: „Babilon“, „The Banshees of Inisherin“, „Everything Everywhere All at Once“, „Glass Onion: A Knives Out Mystery“ и „Triangle of Sadness“.

Ѕвездата на „The Fabelmans“ Мишел Вилијамс ги предводи номинираните актерки во драмата, а нејзини конкурентки, меѓу другите, се Кејт Бланшет (Tar), Ана де Армас (Blonde), Вајола Дејвис (The Woman King) и Оливија Колман (Empire of Light).

Остин Батлер (Elvis), Брендан Фрејзер (The Whale), Хју Џекман (The Son), Бил Наји (Living) и Џереми Поуп (The Inspection) се номинирани за најдобар актер во драма.

Номинација за најдобар странски филм добија „На запад ништо ново“ (Германија), „Аргентина, 1985“ (Аргентина), „Блиску“ (Белгија), „РРР“ (Индија) и „Одлука за заминување“ (Јужна Кореја).

Глобусите се познати како блескава церемонија, а со нив започнува сезоната на награди во Холивуд и служи како своевиден сигнал за номинираните и победниците во трката за најпрестижната холивудска награда – Оскар.

Но, поради контроверзите кои го одбележаа доделувањето на Златните глобуси во 2021 година, церемонијата остана без ТВ-пренос, а победниците беа објавени преку социјалните мрежи и на веб-страницата на Златните глобуси.

Одлуката ја донесе Здружението за странски печат на Холивуд, групата која ги доделува глобусите и ги објавува номинациите.

Истрагата на „Лос Анџелес тајмс“ од 2021 година, меѓу другото, откри дека организацијата нема црни членови. Том Круз ги врати своите статуи во знак на протест, а долгогодишната телевизија „Ен-би-си“ се откажа од телевизиската емисија од 2022 година.

Но, мрежата во сопственост на „Комкаст“ се согласи повторно да ја емитува церемонијата во јануари 2023 година, откако организацијата спроведе реформи. Церемонијата ќе се одржи на 10 јануари.