Канцеларијата на Француското национално собрание денес објави дека предлогот за импичмент на претседателот Емануел Макрон е неприфатлив.

Мануел Бомпард, национален координатор на левичарската партија Неосвоена Франција (LFI), денес напиша на мрежата X дека левицата гласала „за“, макронистите и републиканците „против“, а претставниците на крајно десничарскиот Национален собир (RN) се воздржале.

„Марин Ле Пен повторно го спаси Макрон“, напиша тој,  пренесе  BFM TV.

Францускиот Устав дозволува отстранување на претседател „во случај на неуспех што очигледно се меша во остварувањето на претседателскиот мандат“.

Лидерот на партијата Неосвоена Франција (LFI), Жан-Лук Меланшон, во понеделникот, 6 октомври, повика итно да се разгледа предлогот за импичмент на претседателот Емануел Макрон, по оставката на премиерот Себастијан Ле Корни.

„По оставката на Ле Корни, повикуваме на итно разгледување на предлогот поднесен од 104 пратеници за разрешување на Емануел Макрон“, рече Меланшон во објава на неговата платформа X на 6 октомври.

Предлогот првично беше поднесен на почетокот на септември.

Францускиот премиер Себастијан Ле Корни ја поднесе својата оставка до претседателот Емануел Макрон во понеделникот, која тој ја прифати.

Ле Корни беше назначен за премиер на Франција на 9 септември, а со неговата оставка, тој стана премиер со најкраток мандат во историјата на земјата, откако отслужи 27 дена на функцијата.

Оставката дојде помалку од 24 часа откако беше претставена првата фаза од новата влада, во која претежно беа вклучени поранешни министри и блиски соработници на претседателот Макрон.