Во Гана усвоен предлог-закон со кој станува нелегално идентификувањето како ЛГБТИ лице
Парламентот на Гана усвои нов предлог-закон со кој се наложува затворска казна до три години за секој кој се идентификува како ЛГБТИ, јавува Би-Би-Си.
Исто така, ќе се воведе максимална затворска казна од пет години за формирање или финансирање ЛГБТИ групи. Пратениците ги блокираа обидите за замена на затворските казни со општествено корисна работа и советување.
Тоа е најновиот знак за растечко сузбивање на правата на ЛГБТИ заедницата во конзервативната западноафриканска нација.
Нацрт-законот, кој беше поддржан од двете главни политички партии во Гана, ќе стапи на сила само ако претседателот Нана Акуфо-Адо го потпише како закон. Тој претходно рече дека ќе го направи тоа доколку мнозинството жители на Гана го сакаат тоа.
Хомосексуалните односи се веќе забранети во Гана, а казната за тоа е три години затвор.
Минатиот месец, Амнести интернешнал предупреди дека предлог-законот „претставува значителна закана за основните права и слободи“ на ЛГБТИ луѓето. Активистите стравуваат дека сега ќе започне лов на вештерки против членовите на ЛГБТИ заедницата и оние кои се борат за нивните права и велат дека тоа ќе принуди некои да се кријат.