На местото на големата дива депонија во Драчево, на местото викано Дупки, во тек е изградба на парк со кино на отворено. Паркот ќе се простира на 7500 квадратни метри, а во него ќе има детско катче, пешачки патеки, урбана опрема, многу зеленило и дрвца, а просторот ќе биде и целосно осветлен.

Она што можеби е најинтересно е дека тука, во Дупки, започнуваме со изградба на првото кино на отворено во општина Кисела Вода. Посетителите кои тука ќе доаѓаат, ќе имаат и каде да ги остават своите возила, бидејќи во овој комплекс ќе изградиме и паркинг од 900 метри квадратни за 40 автомобили – вели градоначалникот Орце Ѓорѓиевски.

Според него, стратегијата за чиста и зелена Кисела Вода преку трансформација на локалните диви депонии во зелени паркови, веќе ги дава и првите резултати.

 Наместо депонија, во некогашен Оксиген сега има модерен спортско-рекреативен центар кој повторно ги врати жителите во ова, порано за нив култно место. Паркот „Иднина“ на кружниот тек помеѓу Кисела Вода и Припор исто така е поранешна депонија, а сега прекрасна локација каде често се минува слободното време – потсетува градоначалникот и додава дека се надева дека сето ова ќе влијае и врз свеста на граѓаните и ќе го спречи создавањето нови црни еко точки.