Во Даутпашиниот амам е поставена изложбата „70 години од првата Национална поставка (1951-2021)“
Во објектот Даутпашин амам од 9 септември е поставена изложбата со наслов „70 години од првата Национална поставка (1951-2021)“, организирана по повод 70 години од свеченото отворање на првата Поставка во некогашната Уметничка, а денес Националната галерија.
Повеќе од 100 автори со околу 150 ликовни дела (слики, акварели, цртежи, графики и скулптури) подарени и откупени во периодот од 1948 до 1951 година се застапени на изложбата „70 години од првата Национална поставка (1951-2021)“.
Изложбата претставува уште едно потсетување на успешните работни почетоци на галеријата и на огромниот вложен напор на тимот што тогаш ја водел Уметничката галерија (Борко Лазески и Никола Мартиноски), Комисијата за откуп на ликовни дела, чии членови биле извонредните познавачи на уметноста и ликовни авторитети – Димче Коцо, Лазар Личеноски и Димо Тодороски, како и државните институции кои несебично и со голема одговорност дале поддршка и придонеле тогашната Уметничка галерија да прерасне во храм на уметноста и двигател на културниот живот во Македонија.
Во тој период се направени трите најзначајни чекори во постоењето на оваа установа: Даутпашиниот амам е адаптиран во галериски простор, формирана е богата галериска збирка и отворена е првата поставка од ваков вид во Македонија.
На 2 август 1951 година, на свеченото отворање на Галеријата биле изложени дела од современата македонска уметност, дела од современата југословенска уметност, икони од 14 до 20 век, копии од фрески и макети од македонските средновековни цркви.
Погледот кон периодот на почетоците од формирањето на првата Поставка во тогашната „Картина“ или „Уметничка“, а денес Национална галерија на Република Северна Македонија, навидум временски краток, но долг и богат, професионално претставува потсетување за вложениот напор, но и на резултатите кои се за почит и никогаш не треба да бидат заборавени. Куратори на изложбата се Славица Алексоска, Маја Чанкуловска Михајловска и Маја Неделкоска Брзанова.
Поради трагедијата во Тетово и прогласените денови на жалост, изложбата немаше свечено отворање, со што колективот на Националната галерија се придружи кон институциите кои во знак на жалење направија отстапки во своите активности и на тој начин изрази солидарност и длабоко сочувство со семејствата на починатите и повредените во страшната трагедија.
Изложбата ќе биде достапна за широката јавност до 13 октомври, а дополнително ќе биде одреден датум за промоција на каталогот за истата. Според актуелните протоколи, при посета на изложбата задолжително е дезинфекција на раце, носење заштитни маски, како и потврда за вакцинација/прележан вирус, соопштија од Национална галерија на РСМ.
(Текстот е објавен во „Културен печат“ број 96, во печатеното издание на весникот „Слободен печат“ на 11-12 септември 2021)