ВМРО-ДПМНЕ ветува дека ќе основа министерство за енергетика и минерални суровини
ВМРО-ДПМНЕ, во соопштението посочува дека, макотрпно ќе работи на проекти за заштита на животната средина, бидејќи здравјето на македонските граѓани е пред сè и над сè.
ВМРО-ДПМНЕ ветува дека кога ќе дојде на власт ќе спроведе мерки за доброто на граѓаните. Граѓаните на Република Македонија заслужуваат проекти кои ќе значат воведување на европските стандарди во однос на енергетската независност и ефикасност и заштитата на животната средина, наведуваат во соопштението од партијата.
ВМРО-ДПМНЕ се обврзува на обнова која подразбира основање на ново министерство за енергетика и минерални суровини кое ќе се фокусира кон проблематиката на енергетиката како клучна област за стратешки развој за државата.
-Тоа не значи дека ВМРО-ДПМНЕ ќе ја зголеми бирократијата. напротив ќе ја намали бирократијата, и ќе го намали бројот на министерства кои што сега се покажаа како нефункционални и непотребни во државната структура. Министерството за енергетика ќе биде клучно за развојот на овој стратешки сектор во Република Македонија- стои во соопштението.
ВМРО-ДПМНЕ се обврзува да врши издавање зелени државни обврзници за повеќе зелени проекти.
-Овој проект предвидува министерството за финансии да издаде зелени обврзници кои ќе бидат долгорочни должнички хартии од вредност. Средствата обезбедени по основ на овие обврзници ќе имаат стриктно определена намена односно ќе се користат за проекти за решавање на проблемот со загадувањето и заштитата на животната средина- наведуваат од партијата.
ВМРО-ДПМНЕ, во соопштението посочува дека, макотрпно ќе работи на проекти за заштита на животната средина, бидејќи здравјето на македонските граѓани е пред сè и над сè.