Четвртата годишнина од насилствата во Собранието поминува во знакот на повторни нагласени несогласувања помеѓу владејачките и опозициските партии околу квалификациите на овој настан, како и на неделните протести за ослободување на осудените. На денешен ден пред четири години во Собранието се случи најтешкиот инцидент кога пратеници беа тепани од граѓани што насилно влегоа во објектот. За овој настан има пресуди и осудени лица, но тој се уште предизвикува различни дилеми и меѓу политичарите и меѓу граѓаните.

Претседателот на Собранието Џафери изјави дека овие насилни настани, според него, никогаш не требало да се случат и тоа не смеат да се повторат.

– Во која било форма сите бевме натепани (физички или психички) што бевме внатре, без исклучок – рече Џафери.

Премиерот Зоран Заев денеска потсети на лузните што ги носи како еден од учесниците на, како што рече, непосакуваните настани од 27 април 2017 година и ја испрати пораката – да не се повтори никогаш повеќе, ни во Северна Македонија, ниту каде било во светот.  

– Ќе го споделам уште еднаш чувството дека тој 27 април 2017 година два часа и 15 минути секоја секунда јас, колегите пратеници и новинарите околу нас чекаа да го изгубат животот. Буквално секоја секунда, векови беа тие два часа и 15 минути. Денеска да се организира собир за да се даде поддршка на осудени луѓе што се обидоа на очиглед на јавноста  јавно да убиваат и да ликвидираат новинари, камермани, пратеници во Собранието е или забеганост или е соучесништво, ништо друго – рече Заев.

Со свој став излегоа и политичките партии. За СДСМ, 27 април е најцрниот датум во историјата на македонската демократија, 27 април е крвавиот печат на ВМРО-ДПМНЕ.

ДУИ, пак, апелираше до сите политички партии да се заложат дека 27 април повеќе нема да се повтори.

„Појавувањето на менталитетот од пред 2001 година не му личи на едно мултиетничко општество и држава како што е Република Северна Македонија, бидејќи тоа го отежнува континуираното градење на доверба меѓу нашите народи“, се посочува во соопштението од ДУИ. Според ДУИ, сите политички сили треба да ги осудат и да се дистанцираат од архаичните и регресивни идеи, што беа искажани на протестот во неделата.

Претседателот на ВМРО-ДПМНЕ, Христијан Мицкоски, оцени дека масовноста на протестот што се одржа во неделата го покажала големото незадоволство на граѓаните од Владата, но, пред сѐ, масовна поддршка на лицата кои, според него, се неправедно осудени за дело што не го направиле, а тоа е тероризмот.

– Она што ние го поддржуваме е правда. Никој не вели дека поддржуваме насилство. Напротив, во Македонија постои судска практика, дел од случаите за кои има основано сомневање дека биле политички инструирани, да има повторно судење од почеток за да се аргументираат позициите на двете страни – на обвинителството и на лицата што се обвинети. Тоа е она за кое ние се залагаме – изјави Мицкоски.