Влада со ДУИ за Мицкоски е непосакувано сценарио: „За аферите ќе си одговараат“
„Можам да ја кажам мојата политичка проценка дека во овој момент за ВМРО-ДПМНЕ влада со ДУИ не е посакувано сценарио. ВМРО-ДПМНЕ најмалку го посакува тоа сценарио да има влада со ДУИ и со ова нивно раководство“, рече претседателот на ВМРО-ДПМНЕ, Христијан Мицкоски, вечерва во емисијата „Само интервју“ на телевизија „Канал 5“.
Тој вели дека „за криминалните афери ќе има одговорност“.
„Ќе се работи со отчетност и не смее да има во влада министри кои не одговараат пред премиерот, туку пред партискиот лидер. Се знае кој е мандатар и кој е премиер. Кажувам дека такви луѓе, ако јас бидам мандатар, нема да бидат дел од мојот кабинет“, рече Мицкоски.
Тој додаде дека кој ќе биде партнерот на ВМРО-ДПМНЕ во Владата, ќе одлучат две работи: првата е граѓаните на избори, а втората е програмата за која ќе се сложат да се работи во иднина.
„Во политиката не треба да сме во сон, туку со отворени очи. Кој ќе биде партнерот на ВМРО-ДПМНЕ во Владата, ќе знаеме следниот ден откако ќе завршат изборите, а дотогаш ВМРО-ДПМНЕ ќе биде со народот и не само со македонскиот, туку и со албанскиот, турскиот, српскиот, Ромите, Бошњаците, сите“, рече Мицкоски.
Во однос на одговорноста, Мицкоски посочи дека не може да се премолчи криминалите како за надзорот со коридорите 8 и 10д каде во тендерот се менувани условите додека траел истиот и дека потребна е одговорност.