Шпанските кошаркари се првите полуфиналисти на Евробаскет 2022 откако денеска ја совладаа селекцијата на Финска со резултат 100:90 во четвртфиналната фаза. Шпанија редовно од 1999 година на континенталните собири обезбедува пласман помеѓу четири најдобри селекции.

Финците, исто како и против Хрватска во осминафиналето, се покажаа како исклучително тежок и непријатен противник, што го потврдува и одличното прво полувреме кое го завршија со девет поени разлика (43:52), а во неколку наврати имаше и 15 поени предност.

Но, во второто полувреме „црвената фурија“ направи целосен пресврт, доминирајќи особено во третата четвртина со 30:15, а последната ја освоија со 27:23.

Вили Ернангомез беше најефикасен во победничките редови со 27 поени, а неговиот брат Хуанчо додаде 15. Кај Финска најдобар беше Лаури Марканен кој имаше „дабл-дабл“ учинок од 28 поени и 11 скока.

Шпанија во полуфиналето на ЕП ќе игра со победникот од вечерашната пресметка меѓу репрезентациите на Германија и Грција (20.30 часот).