Фудбалерите на Манчестер јунајтед го совладаа Шериф Тираспол со 3:0 во рамките од петтото претпоследно коло во групната фаза на Лига Европа.

Од првата минута за „црвените ѓаволи“ играше и португалската ѕвезда Кристијано Роналдо кој се врати на најдобар можен начин во составот после суспензијата. Гол серијата ја започна Далот во 44 минута, позитивата ја зголеми Рашфорд (65`) по асистенцијата на Шо, а конечниот епилог го постави Роналдо во 81 минута на стадионот „Олд Трафорд“..

Јунајтед е веќе во следната фаза, само не е познато дали во 1/16 финалето или во осминафиналето. Првопласиран е Реал Сосиедад со 15 бодови, три повеќе од Манчестер јунајтед, следува Шериф Тираспол со три, а последна е Омонија без бодови. Во последното коло Реал Сосиедад на 3 ноември е домаќин на Јунајтед.

Рома во групата „Ц“ стигна до важен триумф на гостувањето кај финскиот ХЈК со резултат 1:2. За римската „волчица“ добра вест беше и победата на Бетис против Лудогорец 0:1, па така Италијанците останаа во игра за второто место. Ејбрахам донесе водство за Рома во 41 минута, израмни ХЈК преку Хетемај (54`), а автогол во 62 минута си постигна Хосконен.

На табелата води Бетис со 13 бодови, пред Лудогорец и Рома кои имаат по седум, а последен е ХЈК со еден бод. Во следното коло играчите на Жозе Мурињо на „Олимпико“ ќе го пречекаат бугарскиот Лудогорец.

Во другите мечеви: Црвена звезда – Трабзонспор 2:1, Ференцварош – Монако 1:1, Фрајбург – Олимпијакос 1:1, Нант – Карабах 2:1, Омонија – Реал Сосиедад 0:2 и Штурм Грац 1:0.