Експертот за диви животни, биолог и познат авантурсит Форест Галанте го доживеал најголемиот шок во животот, откако го удрил гром, додека снимал промотивно видео во мочуриште во Еверглејдс Сити, Флорида.

Форест Галанте по инцидентот изјавил дека временските услови биле совршени, сѐ додека тој и неговата екипа не биле при крај со снимањето.

Галанте веднаш излетал од водата и почнал да вика дека го удрил гром, но потоа се смирил и рекол дека сѐ е во ред. Подоцна ја прегледал снимката со неговата екипа за снимање за да види дали камерите го забележале ударот, пренесува „Фоксведр“ (Foxweather).

Добро познатиот авантурист и водител на каналот „Дискавери“, истиот ден на својот канал на Јутјуб раскажа што се случило.

„Леле, каков ден. Значи, денес требаше да биде лесен ден. Ние сме овде во Јужна Флорида и снимаме многу различни содржини, а една од работите што планиравме да ги направиме денес беше да одиме во мочуриштата и да снимаме содржина. “, изјавил тој и додал дека кон крајот на денот почнало да врне, а оддалеку слушнал грмење.

Тој тврди дека не видел молња бидејќи бил свртен кон камерата, но почувствувал како нозете и грбот му се стегаат, објаснувајќи дека се чувствувал како да бил парализиран за дел од секундата.

„Кога го прегледав видеото, сфатив дека громот удри зад мене и минува низ водата покрај моите нозе, во половината, во срцето и всушност во мојата уста“, изјавил тој за своето шокантно искуство.