Екипата на актуелниот шампион Манчестер Сити без многу проблеми славеше (2:4) во денешниот натпревар против Кристал Палас со кој беше отворено 32. коло во Премиер лигата.

Натпреварот за избраниците на Пеп Гвардиола не започна најдобро затоа што по само три минути игра Матета беше стрелец за водство од 1:0. За изедначување десет минути подоцна се погрижи Кевин Де Брујн, тоа беше и резултатот со кој се замина на паузата.

На самиот старт во вториот дел во 47. минути Рико Луис се запиша во листата на стрелци за пресврт на „граѓаните“. Третиот гол во 66. минута беше дело на Ерлинг Халанд, а Де Брујн четири минути подоцна со својот втор гол на натпреварот зголеми на 1:4. Конечните 2:4 беа поставени во 86. минута со голот на Едуард.

Манчестер Сити на табелата со овој триумф се изедначи со по 70 бода со Ливерпул, додека Арсенал е трет со 68. Својот натпревар од ова коло Ливерпул го игра против Манчестер Јунајтед утре, додека Арсенал денес во терминот од 18:30 часот ќе се соочи со Брајтон.