ВИДЕО | Југославија пред 40 години беше домаќин на ЗОИ: Денеска борилиштата во Сараево се во ужасна состојба
Изминаа точно 40 години откако поранешната СФР Југославија беше центар на светот како домаќин на Зимските олимписки игри во Сараево. Во тој период за организацијата пишуваа сите, но денес терените каде што натпреварувачите водеа битки за медалите се заборавени и разрушени.
Олимписките игри се отворија точно на денешен ден 1984 година на стадионот „Кошево“. Славната лизгачка Санда Дубравчиќ имаше чест да го запали олимпискиот оган. Денес, четири децении подоцна останати се само неколку борилишта или подобро кажано траги од нивното постоење. Многу од борилиштата беа уништени и за време на војната во 90-тите години, но и времето си го направило своето.
Најголем дел не се реконстурирани до денес и претставуваат само спомен од едно друго време. Се највуваше дека Сараево може да организира ЗОИ во 2030 година и за таа цел ќе се реновираат скијачките скокалници и нордиските патеки на Игман, но од таа идеја не излезе ништо.
На тие ЗОИ во 1984 настапија 1.272 спортисти од 49 земји, а за првпат настапи еден афрички скијач, Ламине Геје од Сенегал. Продадени беа 250.000 билети за 12 натпреваручки дена, додека на телевизиските екрани барем еден настан гледале над две милијарди луѓе.