Во фантастичното Ел Класико, Реал Мадрид со 2:1 ја совлада Барселона и стана нов лидер на табелата во Ла Лига. Ова е едно од најдобрите Ел Класика во последно време, кое беше исполнето со шанси, голови, а на крајот не изостана и црвен картон.

Реал беше подобар тим во првото полувреме и таквата игра му донесе два гола. Прво во 13. минута, Карим Бензема постигна фантастичен гол со пета по додавањето од Лукас Васкез.
Во 28. минута „кралевите“ поведоа со 2:0 по слободниот удар на Тони Крос, а топката на патот кон голот ги погоди Дест и Алба и на крајот заврши во мрежата на Тер Штеген.

Реал можеше да постигне и трет гол, во ударот на Валверде го одбрани голманот на Барселона.
Но и каталонскиот тим имаше своите шанси во првиот дел кога Лионел Меси ја погоди стативата, а во втората минута од продолжението шутираше директно во голманот Куртоа.

Второто полувреме почна да врне дожд, но не го намали квалитетот на игра. Барселона тргна поагресивно и во 60. минута преку Мингуеза намалија на 2:1. Иако и двете екипи имаа свои шанси до крајот на средбата, мрежите мирува, но сепак возбудувањата не изостанаа. За тоа се погрижи Каземиро кој за две минути доби два жолти картони и беше исклучен, но Реал успеа да го зачува водството и да дојде до победата.

Со триумфот над најголемиот ривал, Реал Мадрид се искачи на првото место на табелата со 65 бода, исто колку што има и Атлетико Мадрид, додека Барселона сега е трета со еден бод заостаток.