ВИДЕО | Челси со убедлива победа против Миделсброу се пласираше во финалето на Лига Купот
Tимот на Челси се пласираше во финалето на Карабао Купот (Лига Куп) откако вечерва славеше убедливо против Миделсброу со 6:1.
Миделсброу ги изненади „сините“ во првиот натпревар победувајќи ги со 1:0, но вечерва едноставно немаа никакви шанси. Челси уште по првото полувреме водеше со високи 4:0.
Предноста од првиот натпревар беше анулирана по само 15 минут игра кога Хоусон си постигна автогол за 1:0. Во 29-тата минута Фернандез зголеми на 2:0, а следен во листата на стрелци се запиша дефанзивецот Дисаси. Одличниот Палмер до крајот на првиот дел погоди за 4:0.
Во второто полувреме Палмер постигна и втор гол за „петарда“ во мрежата на Миделсбору, додека за 6:0 се погрижи Мадуеке на десетина минути пред крајот. Утешниот гол за Миделсброу беше дело на Роџерс пред крајот на средбата.
Противник на Челси во финалето ќе биде подобриот од натпреварот помеѓу Ливерпул и Фулам, „црвените“ имаат предност од 2:1 по првиот натпревар кој се играше на „Енфилд“.