Марко Пејчиновски, младиот македонски пливачки маратонец на отворени води летово го препливуваше Охридското езеро за да инспирира и да докаже дека сè е возможно.

Тој денеска успешно го заврши и последното 10 препливување за ова лето, на релација Охрид – Струга – Св. Наум – Охрид во должина од 64 километри. На празникот Голема Богородица го заврши последниот подвиг за време од 21 час и 42 минути.

Од почетокот на својата пливачка кариера, младиот маратонец прави подвизи кои никој досега ги нема направено. Неговата желба е секогаш да ги крева стандардите, да направи нешто поголемо, нешто потешко, да го тргне зборот „невозможно“ од речникот.

Да докаже и дека и кога нема да се успее, треба да се држи главата горе, да се обидеме пак и да докажеме дека сите можеме, без оглед на пречките кои стојат на патот. Дека и во Македонија има таленти, дека во оваа земја има деца кои чекаат да им се пружи рака да се докажат, дека и тие имаат спортски потенцијал.

Марко ги реализираше сите 10 препливувања, исплива 250 километри. Во продолжение сите негови препливувања, релации, времиња:

1 препливување, Радожда – Охрид, 14 километри, пет часа, 25 минути и девет секунди
2 препливување, Радожда – Градиште, 18 километри, 6 часа и 40 минути

3 препливување, Радожда – Трпејца, 20 километри, 6 часа 4 минути и 39 секунди
4 препливување, Струга – Св. Наум, 30 километри, 9 часа и 26 минути

5 препливување, Струга – Пештани, 21 километар, 7 часа 5 минути и 59 секунди
6 препливување, Струга – Градиште 22 километри, 6 часа 53 минути и 20 секунди

7 препливување, Радожда – Трпејца – Градиште, 24 километри, 6 часа 52 минути и 15 секунди
8 препливување, Заум – Охрид, 18 километри, 5 часа 16 минути и 15 секунди

9 препливување, Градиште – Трпејца (Стог) – Охрид 20 километри, 5 часа и 59 минути
10 препливување, Охрид – Струга – Св. Наум – Охрид, 64 километри, 21 час, 42 минути