Фудбалерите на Атлетик Билбао вечерва се пласираа во полуфиналето на Лигата на Европа, откако во реваншот на домашен терен го победи Глазгов Ренџерс со 2:0. На првиот натпревар во Глазгов, резултатот беше нерешен 0:0.

Головите за Билбао на вечерашниот натпревар ги постигнаа Оихан Сансет од пенал во четвртата минута од судиското продолжение на полувремето и Нико Вилијамс во 80 минута.

Билбао во полуфиналето ќе игра против победникот од дуелот Манчестер јунајтед – Лион.

Играчите на Тотенхем исто така се пласираа во полуфиналето откако го победија Ајнтрахт Франкфурт со 1:0 на гостински терен. Првиот меч во Лондон заврши нерешено 1:1.

Решавачкиот гол на денешниот дуел за англискиот претставник го постигна Доминик Соланке од пенал во 43 минута.

Тотенхем во полуфиналето ќе игра против подобриот од двомечот Лацио – Бодо/Глимт.

Првите полуфинални натпревари ќе се играат на 1 мај, а реваншите се закажани седум дена подоцна.