Кошаркарската репрезентација на САД ја оствари првата победа на подготовките пред настапот на Олимписките игри во Токио, дрим тимот со 108:80 ја совлада Аргентина.
Ова беше прв триумф на репрезентацијата на САД по серијата од три порази на средби во кои настапија кошаркари од НБА лигата. Таа серија ја сочинуваа поразот во натпреварот за петтото место на СП во Кина и двата порази од Нигерија и Австралија во подготовките.

Дрим тимот одлично го започна натпреварот, погоди шест тројки во првата четвртина и направи двоцифрена предност која не ја испушти до крајот на наптреварот.
За репрезентацијата на САД играа само осум од 12 кошаркари кои ќе настапат на Игрите во Токио, Џејсон Тејтум го преседе дуелот со Аргентина поради болки во коленото, додека Џру Холидеј, Крис Мидлтон и Девин Букер играат во големото НБА финале и подоцна ќе му се приклучат на националниот тим.
Најефикасни во тимот на САД беа Кевин Дурент и Бредли Бил со 17 поени, Зек Лавин даде 15, а Демиен Лилард даде 13 поени.