Еврокомесарот за проширување и соседна политика на Европската Унија Оливер Вархеји, синоќа на Твитер објави дека разговарал за претстојните парламентарни избори со претседателите на СДСМ и ВМРО-ДПМНЕ, Зоран Заев и Христијан Мицкоски.

– Вечерва разговарав со лидерите на СДСМ Зоран Заев и на ВМРО-ДПМНЕ Христијан Мицкоски за да ја нагласиме важноста за слободни, фер и инклузивни избори во Северна Македонија, земајќи ја предвид ситуацијата со Ковид-19, како и потребата од ефикасни мерки за економско закрепнување, напиша Вархеји.

Владини претставници претходно нагласија дека не се размислува за продолжување на вонредната состојба која завршува во сабота, а дека потоа треба да продолжат активностите за изборите на 5 јули.

Задолжено е и Министерството за здравство, согласно протоколите од Комисијата за заразни болести, да обезбеди заштитни маски, ракавици и друга потребна заштитна опрема за сите членови на изборните органи и средства за дезинфекција за секое избирачко место. Сепак, засега се уште нема никаква информација од Заев и Мицкоски за разговорот со Вархеји.