Уставните измени го поминаа владиниот филтер, од утре влегуваат во собраниска процедура
Владата на денешната седница ги усвои уставните амандмани и одлучи документот да биде доставен до Собранието на Република Северна Македонија.
– Интервенциите се однесуваат на додавање делови од народи во Преамбулата и членовите 49 и 78 од Уставот, при набројувањето на деловите од народи во нашата држава. Односно, во формулацијата: „Граѓаните на Република Северна Македонија, македонскиот народ, дел од албанскиот народ, турскиот народ, влашкиот народ, српскиот народ, ромскиот народ, бошњачкиот народ и другите”, после зборот бошњачки народ се става запирка и се додава: бугарскиот народ, хрватскиот народ, црногорскиот народ, словенечкиот народ, еврејскиот народ и еѓипќанскиот народ, се наведува во соопшението од Владата.
Од таму додаваат дека со предложените Уставни измени, се зајакнува мултиетничкиот карактер на Република Северна Македонија која практикува европски вредности и заслужува, по членството во НАТО да биде и полноправна членка на Европската Унија.
Од Владата велат дека во следниот периот очекуваат конструктивност од сите политички субјекти претставени преку пратениците во Парламентот, совесност од сите пратеници и фокус кон постигнување натпартиски консензус при усвојувањето на уставните измени како дел од преговарачката рамка со Европската Унија.
Ставот на ВМРО-ДПМНЕ останува непроменет. Пратеничката Дафина Стојановска денеска од Собранието порача дека нема да отстапат ниту милиметар од одлуката дека уставните измени нема да добијат поддршка од пратениците на ВМРО-ДПМНЕ.