Меѓународната ликовна колонија „Михајлово 2022“ од 20 август е отворена во Кавадарци. Ликовниот уметник Владимир Темков е куратор на традиционалната манифестација што се одржува по 27-ми пат.

Темков нагласува дека станува збор за еден од најзначајните вакви настани во тој регион, поддржан од Министерството за култура и Општина Кавадарци. На колонијата творат уметници од Словенија, Србија, Турција, Црна Гора, Грција, Македонија, Косово, Германија и Русија.

– Почетокот на колонијата, по традиција, е со отворање на изложба. Овој пат се изложени дела на ликовниот уметник Стефан Хаџи-Николов. За време на колонијата ќе се одржат изложби и на Диме Темков од Словенија на 22 август со наслов „Слики од морето и ловот“ во Музеј-галерија и на Новица Трајковски на 24 август со наслов „Тиквешанка – во спомен на виното“ во Вински музеј. Ќе има и промоција на книгата „Наива – наивното сликарство и скулптура во Македонија“ од Гоце Божурски, во Винскиот музеј – информираше Владимир Темков.

Темков додаде дека уметниците ќе сликаат во Вила „Рума“, во село Дабниште. Таму ќе биде и затворањето на колонијата, на 25 август со изложба на новосоздадените уметнички дека, како и со настап на кавадаречки рок-групи.

(Текстот е објавен во „Културен печат“ број 142, во печатеното издание на весникот „Слободен печат“ на 20-21 август 2022)