Во Домот на култура „Кочо Рацин“ во Скопје на 6 април се одржа литературна вечер на која беа промовирани три книги од авторката Гордана Каракашевска: книгата со раскази „Сињор Џордано и размислувањата за…“, стихозбирката „Скршен поет и други поеми“ и романот „Разголување“, објавени во 2021 година, а кои поради ковид-пандемијата досега немаа промоција.

Модератор на настанот и промотор беше Елеонора Николовска, а избор стихови читаа Елизабета Клинчаревска Младеновска, Лепосава Поповска и Тодорка Филиповска. Во сите три дела темата е убавината, љубовта и пролетта.

Значајно за сите три книги е тоа што се дел од Современа македонска книжевност – едиција „Книжевни меридијани“ и истите се носители на награди на конкурси распишани од издавачката куќа „Дата песнопој“ – Битола. Стихозбирката „Скршен поет и други поеми“ (носи II награда „Душата на чаршијата“), новелата „Сињор Џордано и…“ (носи II награда „Пелистерски ракувања“) и романот „Разголување“ (носи II награда „Пелистерски ракувања“) издадени од „Дата песнопој“ – Битола.

Книгите се објавени под псевдоним на авторката – Ана Каракаш. Автор на кориците на сите три книги е Илија Мерковски, главен и одговорен уредник во издавачката куќа „Дата песнопој“ – Битола, која зад себе има децениска успешна работа.

(Текстот е објавен во „Културен печат“ број 226, во печатеното издание на весникот „Слободен печат“ на 13-14.4.2024)